Exo 24 | SWP | STEP | I ribalau Mose arinai i ene, “Au saema GUIAU arinai, oa eo Arona, Nadabi, eo Abihu, eo Isaraela babadayao tatao‐haiona‐se‐mate‐saudoudoi: eo eda lohaloha eai abo au aihelahui.

Exodus 24

Ribahesunuma Hemamohoiena

1 I ribalau Mose arinai i ene, “Au saema GUIAU arinai, oa eo Arona, Nadabi, eo Abihu, eo Isaraela babadayao tatao‐haiona‐se‐mate‐saudoudoi: eo eda lohaloha eai abo au aihelahui. 2 Mose iabom abo GUIAU i hanahanaui, na isi taba nige se hanahanaui, tatao hinage taba nige maenayao se saema.

3 Mose i laoma tatao i heribadi saha eo saha GUIAU i ribaei, eo laugagaeo gamagaridi hinage; abo tatao gamagaridi se heuio arinadi esega, si ene, “Riba gamagaridi GUIAU i ribaedi meta abo ai lauwataidi.” 4 Arinai Mose GUIAU ena riba gamagaridi i uridi, abo maratomtom ariri eai i enotoro eo aba‐aitalasam i hetoro oea paana eai, du saudoudoi‐labui hinage, Isaraela ana bogao enadi. 5 Eo Isaraela edi hewahewari i hetamaridi, bena aitalasam gabugabudi, eo labini aitalasamdi, isi ede bulumakau, se heaitalasamdi GUIAU arinai. 6 Eo Mose osina tupona ie abi ie tore gulewa alodi eai eo osina tupona i lausibusibuei aba’aitalasam potana eai. 7 Murina eai ribahesunuma bukana ie abi eo i hasiri tatao edi ata’atai eai: to si ene, “Saha eo saha GUIAU i ribaedi meta abo ai ginauriwatai, eo abo ai awa’abiedi.” 8 Eo Mose osina ie abi i lausibusibuei tatao potadi eai, i ene, “Au ita, ina ribahesunuma osinana ede, ia ede GUIAU i ginauriyao arimiu eai ina riba aridi eai.”

9 Arinai Mose, Arona, Nadabi, Abihu eo Isaraela edi babadayao tatao‐haiona‐se‐mate‐saudoudoi se sae. 10 Abo Isaraela edi Eaubada se ita, eo aena ubuna eai doha we’u matuna namanamarina, eo hinage i masaraha ariri doha galewa mamohoina. 11 Nimana hinage nige i lausini Isaraela edi babadayao potadi eai, na Eaubada se ita, eo se ai eo se nom.

Mose Sinai Oea Tupina eai

12 GUIAU abo i ribalau Mose arinai i ene, “U saema oea tupina eai, eo nei eai u bagibagi: eo we’u lailaidi tabatabadi abo ea lediwa, potadi eai lauhesom eo laugagaeo ea uridi wa, bena u lauheataedi.” 13 Arinai Mose i torohai maena heaheari Iosua, eo Mose ie sae Eaubada ena oea tupina eai. 14 I ribalau babadayao aridi eai, hinage i ene, “Ina au bagibagiemai, i lau e ai uioma arimiu eai: au nuatui Arona eo Hura maemiuyao, ena esau ena pilipili saha abo i lau aridi eai.

15 Arinai Mose ia sae oea tupina eai, eo eada wa arinai oea i buburi heohi. 16 GUIAU ena namanamari ie ota Sinai oea tupina eai, eo eada wa i buburi asubena haligigi‐esega. Abo asubena hehaligigi‐labuina eai eada wa boeana eai i eogalau Mose arinai. 17 Na GUIAU ena namanamari ana ao Isaraela tataodi matadi eai doha oeagi ala’alabalebalelemna oea tupina potana eai. 18 Eo Mose i soralau eada wa boeana eai, eo ie sae oea tupina eai. Mose hinage oea tupina eai wa ie mia asubena tatao‐labui‐se‐mate eo maiona tatao‐labui‐se‐mate.